第一次ivf 失敗

21／8 day 11
昨晚臨時塞小白球在陰道，希望不要再有血絲。但可能個人緊張不安，我塞小白球都塞了一小時先成功。

今早發現血多了，決定跟老公見醫生，醫生沒多說甚麼，只強調先驗血再講。然後一個小時，都唔算難捱，可能覺得自己失敗居多，因為見到出血同腹痛

最後醫生睇報告，話唔成功，因為機率問題。

我一直好堅強地跟老公步出醫院，未識得傷心，可能大家都要消化下件事。

米米，感謝你讓我知道你都分裂到成胚胎，讓我可以係超聲波見到你閃亮的白點。某程度上，起碼你無令我更難受，我身體仲受得住，經痛好快會過。

可能我都做得唔多好，或者你有特別原因不選擇我。

我打這篇文時，終於流淚，我無係老公面前喊，唔想佢見到我難過。

醫生問我打算幾時放雪胎，我諗我要再有心理準備，身體再強點先進行。

移植後反應

11／8 day 1
移植後起的日子計Day 1，今日下腹陰陰痛，無打針日子甘緊張，但似輕微經痛，一陣陣的痛，間唔中又忍忍痛

加上昨日突然肚瀉，令我大為緊張，我都唔知食錯乜野，老公，姨媽都無事

陰道有分泌物，啡色的，應該昨日術後出血

訓床又唔敢側訓但又好肚痛應,應該肚有風，最後突然凌晨4點尿意起，頂唔順又側睡，不停放屁

12／8 day 2
肚風少左但無之前甘痛，雖然可接受，但我都想輕鬆點，我其實無壓力，打針仲大壓力

男家親友突然上門，跟他們一起吃午飯，走動一下都覺得好似無甘痛，親友對我很好

今日同樣又係凌晨4點急尿，去廁所非常頻密，呢兩日訓得不多好

13/8 day 3
下腹仍然陰陰痛，但我都由佢，轉換不同的角度訓床
終於有正常大便
食了黃體藥，葉酸，腸道真係好慢

14／8 day 4
終於叻左，一教訓到六點，都要去廁所
我唔理，照正常飲湯飲水
媽媽以為我腎虛，叫姨媽煲補腎湯水
杜仲烏雞湯，飲落好舒服

15／8 day 5
今日老公生日，決定係深圳食巴西燒烤慶祝
尿頻少了，腹痛少了
行左一陣商場，感覺好左，要慢慢行
老公嘆喜茶，我無份

16／8 day 6
豬一般的生活，其實我都係無方法令下腹唔好太痛
有時用手輕輕打圈，睇手機分散下注意力
但我覺得胸脹，右邊腋窩淋巴位都痛
我只好輕輕按摩

17／8 day 7
老公成日作弄我，搞到我哭笑不得
訓沙發，可以睇電視唔錯
晚飯後，只有我一個肚痛
我以為食得太飽
都係小心的食野，好彩唔係大瀉
半夜突然我個肚很痛，好似俾針，劍刺入去一樣
我痛到捏老公隻手，佢感到我真係好痛，出曬汗
佢驚到問我洗唔洗去急症
我話唔洗，等佢慢慢散去痛楚，等我訓
米米，一定要痴實我

18／8 day 8
我今日凌晨去廁所，好彩無甘肚痛，但昨晚痛一痛都唔咪話唔驚
我食完每餐都休息，然後訓下沙發，床
下腹仍有陰陰痛，肚風都有
好彩平安又一晚

19／8 day 9
昨晚算係我最好訓的一晚，深圳住宅附近好多人勁早起身，五點幾俾佢哋嘈醒左，好在一陣又訓返，最後都係九半起身

去廁所抹乾時，突然看到一條好幼血絲，都好驚
食完早餐訓梳化，食完午餐訓床，晚餐後都係訓床，很早就在床上。由於太早，反而訓唔著，樓宇附近又唱歌又大叫，搞到我凌晨兩點先訓

20／8 day 10
今早無事無痛，很開心食早餐，奶奶及五姨到訪採望我，大家傾幾句左右就走了
去完廁所令我很不安，血絲多左，令我諗係咪經期差唔多到，肚子突然間跳動，抽了幾下
情緒開始到，周圍問ivf group sis 點處理，其實醫生只開了孕酮給我。。。。
要痴實我呀，米米，我真係唔嚇得。。。。。
訓下床先

移植日

10／8 day 20
老公很緊張，他話唔知道受精卵多唔多
我話唔洗打針我好安落
同時都交俾實驗室，做icsi 睇下如何結合

八半前到生殖中心報到
護士叫名登記，核對身份証，婚紙
醫生表示七粒中左兩粒，種一雪一
老公很開心

有了上次抽卵經驗，今次不用禁食
術前飲水有尿意就可以了

同樣穿手術袍，戴頭套，穿拖鞋
訓在床上腿張開，沒有麻醉
有少少唔舒服，但都可以接受
護士在肚上擠Jelly 超聲波
我在屏幕見到自己的子宮
話我內膜唔錯
透過軟管射入一粒米仔甘大的胚胎
見到白色點點黏在我的子宮內
可能我有點緊張，護士跟我談天
她話現在可以下床了，祝好孕

醫生說我的陰道有出血，要小心行，
我好小心，太空慢步行入房間訓床
到床上訓30分鐘
我很急尿，但都忍忍忍
其實手術後可以去廁所的

11.10分完成手術
我在11.45分離開
醫生開了黃體素藥丸我食
叫我移植後14日抽血驗孕

為了不要令自己胡思亂想
我不會偷步驗
期待14日後的結果

抽卵日

6／8-8/8 day 16-18
覆診再睇醫生，他陰超都話我的卵子唔錯，暫時睇都見到有4粒，但在18－22mm 既只有三粒，抽卵只有靠右邊

醫生見差唔多，決定8／8抽卵，今早的針藥打完，今晚要按醫生寫的時間打夜針。雖然住深圳祖屋，但亦唔想夜晚晚進出醫院，我決定自己打夜針。醫生唔建議，想姑娘幫我打就穩陣，後來我們爭取自己打，醫生都千叮萬囑要準時打針

其實打甘耐針為的都係抽卵日，但我很緊張，真心怕痛，醫生話有麻醉同埋放心交給他們處理。

當晚教定鬧鐘，快手幫自己打針，我覺得自己很快樂，打完了十多日針，每日訓得唔好就係為了準時打針，覆診，照卵泡，都係壓力。

7／8
快樂的一天，老公跟我的八姨媽去大商場食野，行街，又看看市場有乜野買

8／8
抽卵日
由於昨晚12時要禁食，我心情緊張，等大家食完簡單早餐，一齊出發去醫院等待

我們先去三樓人工授精室等，護士叫我們直入生殖中心登記資料

登記時要雙方身份證及結婚證明書，之後老公取瓶等叫名抽取精液，我就要入針做靜脈注射，即係種豆。老實講比起香港種豆，護士手勢極好而且很幼針，落針係緊張，但之後可以自由活動。

然後我係第一個叫名進行抽卵，我忍唔住喊，真心好怕，護士叫我放鬆好快做完，唔痛的。護士要我穿上手術用衣服，底褲交給老公，我放入自己手袋都可以，然後除鞋，穿拖鞋，準備入手術室前一定要去廁所，無都要你排下尿。

入手術室要做指紋驗證，螢幕見到我同老公入院前合照，然後好似婦檢，腿張開，然後穿腳套，成塊藍色手術報包住，醫生開始用酒精清潔外陰部，然後就入陰超棒，之後麻醉師話注射，然後我應該太緊張一路數1－100,下體就無乜感覺，跟聽到達達達的聲音，十分鐘就已經完成手術，而我飲醉酒狀態俾護士坐輪椅再推去私家病房。

我問返老公，我在手術室的時候，護士帶他去房入面手淫取精，然後交去隔離化驗室，佢完成後就上去我的病房，他話我都訓左一小時，我想我真係前晚又緊張又唔係訓得好，難得由打針衝到抽卵，真係訓返好覺。

護士每小時都會量血壓，叫我第一餐先食粥，長時間禁食唔好食固體食物，怕我會嘔，老公都叫外賣，大家在私家病房食野傾計，當然我仲努力甘飲寶礦力。

老公真係太累，我見好左少少，就叫老公係床上休息下，間房用四小時，我見差唔多兩點就叫護士拆豆，原來針位比香港的幼細好多，香港插手背，內地插抽血位左邊，所以唔算太痛。

回家後，姨媽煲冬瓜薏米西施骨，怕太寒，加了紅棗薑片，煲湯飲去水都好快。但到了四點幾開始脹肚，應該有少少卵巢反應，我都努力飲水，要多去廁所。

晚上覺得下腹少少悶悶痛，我把暖貼貼在右邊肚皮，即時覺得舒服曬。

繼續開針

3／8－5／8 day13-15
覆診時其實個人都很緊張
我終於明白做試管媽媽的心情
希望自己可以多一粒卵多一個機會

Ivf 療程進行一小半，主要都係因為針藥對我的卵巢作用一般，第一次用puregon 由300 iu 增強至450 iu ,增加劑量又好似卵子大左小小，最後醫生改左 gonal F, 但一打就要打成支450 iu，明日覆診先知道反應如何。

曾經我一度想過放棄，打針好痛，可能我本身都係怕痛，早幾日打到個人很抑鬱，很小事就喊，唔排除荷爾蒙影響到情緒。然後一眾ivf 群組姐妹們話不要輕易放棄，還有我們，非常感動。

她們很勇敢，好似精神支柱，自己打針，憑著一個求子的信念支撐，我都知我煩，因著各方朋友的like 支持，令我感到無甘難過，但所有針藥都係女人，即係我受。

打Puregon 我覺得傷身，無論我點樣打，肚皮都係有瘀傷，只係大瘀傷或小瘀傷，gonal F 望落去真係重形武器甘，但打落去好似蚊針一樣，用姐妹的方法打得好順利，真係搵唔到針口

最初一支可以分兩次打，但因為我要加大劑量，要分兩針，所以好痛苦。。。

Puregon ,gonal 都係促排卵針，打了令卵子變大，但視乎患者藥物反應。

另一隻針是ORGALUTRAN，预防過早出現促黄體激素(LH)，支針頭較粗，打完針無puregon 有瘀傷，但打完後佢後勁好強，我應對方法係，打完後按針口再彎腰輕輕躺在床上，然後感到你針口附近發紅，第一次打時，我以為過敏，然後蟻咬，幾隻蟻在附近咬你一樣，痛到流眼淚，半小時至一小時就無甘痛，但感到卵巢附近跳跳下甘，兩小時後無事

每次打針前都要衝過心理關口，我由15分鐘處理兩至三口的針，現在可以10分鐘處理打針。

勇者無懼。。。。

#ivf #ivfhk #ivfchina #深圳香港大學醫院 #試管嬰兒 #勇者 #打針 #生仔唔容易 #卵巢好重要 #為左粒蛋

終於進行第一次試管嬰兒：開針2

31/7-2/8 Day 10-12
30／7覆診主要睇卵子的情況，我滿心歡喜諗住都打曬8日針，可以還針盒，但護士表示要睇醫生決定要唔要再打針。我聽後，甚為不安。
終於等叫號見醫生，醫生表示見面主要陰超觀察卵子的生長程度，結果我左邊2粒，右邊3粒，以我這個年紀算弱，但醫生表示貴精不貴多，無奈暫時無一粒合格，因為抽卵的基本大小為18mm-22mm,10mm 勉強合格作紀錄，我最大粒的只有9mm,所以要打多3日針藥，而且要加大劑量。

老公比我更緊張，佢係門外聽，但乜都聽唔到，報告出左，醫生用了不同的人跟我分析，話針藥對我卵巢幫助得太少，有啲甚至停止生長，但亦有啲卵子受左針藥都會變大，醫生見我眼有黑眼圈都問我是否睡眠不足都會影響卵子質素。

因為我教書，習慣某個時段起床，但可能人比較緊張，就要打針，結果比返工的日子更早起床又訓唔著。

最後護士唔肯多借一套針盒給我，我覺得我只借三日，我要你針盒做乜，不過算了，護士對於我們做試管的沒有很多的同理心，可能見慣了，甚至講了句你預左係甘樣打，我們幫你打都係甘打，其實我第一針俾你哋打都打瘀左，我唔需要同情，但只係想對病患好些。


跟老公吵了一輪，喊了好一陣子，打針對於我而言，真係好大壓力，有誰喜歡被針扎

最後還是死死地氣自行打針，但情緒很差很波動